............
أنـــا وانتِ
مينفعش نكون أغراب
مينفعش نكون اتنين
أنا وأنتِ كيان واحد
ومتاخد فى دنيا العشق والاحباب
دا أنا لو شئ بيألمني
بسمع آنتك بيا
وأحس بشئ بيخنقني
لومرة نَفسِك عني غاب
فكيف ممكن نكون بعاد!!
إحنا مخترناش
ولا كان لينا يد فى شئ
دا العشق خدنا
وضمنا فى بيته وسَك الباب
ولو إنتِ تقدري تعيشي من غيري
أنا مقدرش ....ودا مش ضعف
بس لأني يوم ما حبيتك
شلت قلبي اللي فى ضلوعي
وبقيتي إنتِ القلب
فصعب
صعب أقدر أكمل
ولو خطوة من غيرك
صعب أقدر أكمل
ولو خطوة من غيرك
ولا أتخيل أكون وحدي
وإنتِ مش فى الدرب
مينفعش بعد الحب نقابل
ونسلم كدا عادي
دا لما بتمري قصاد عيني
بتتهز من حنيني الارض
فمقدرش أقاوم الاحساس
ولا أمنع شوقي من ضمك
وانا اللي مكنتش أعرف أنام
ألا وانا فى حضنك
أنا وانت سنين وحساب
أنا وانت سنين وحساب
ومشوار أبتدى بكلمة
وشعر أسود من طول الزمن شاب
أنا وانت لليالي عشتنا وعشناها
ما بين دمع وفرح وعتاب
قوليلي فين أروح بالحب فى غيابك
وكيف أقدر على الاحساس
انا ممكن تاخدني عزة نفسي قدامك
وأقولك روحي أنا نسيتك
لكني ها أكون كداب
أنا عاشق ملاني العشق
ولا خلى فى كياني مكان
فكيف أقدر أفضيني
ومين دا اللي يقدر يخليني انساكِ
ساعات الدنيا تخنقنا بهمومها
وتخلينا نعاند الحساس
ونلعن سلسفين الحب
بس وقت الجد
وساعة ما القلوب تتهز
بندور عننا فينا
ولا نحس بأمان
غير لما أحضانا تقابل بعض
انا وانتِ جايز هنتفارق
بس يفضل فينا النفس عايش
صعب
.................
بركات حمدي
