تلات سنين

تلات سنين

 عشرة ومحبة.. ومعرفتنيش

تلات سنين

 واخدك في حضني

شايلك في قلبي ومحستيش

 وانا مش عرفتك

 او حفظتك او دخلتك

 انا عشتك ليالي

كنتي نفسي لما بضحك

كنت همي لما بزعل كنت دمي

وبعد كل الوقت دا مفهمتنيش

تلات سنين

 كنت اتجاهي فين ماولي

كنت قبلة لما اصلي

 كنت اقرب حد ليا

كنت اهلي 

انا مش هخطي بضعفي

ناحية  قلبك المغرور

وان كان على كل اللي بينا

لو بالاهانة يغور

انا فيا طيبة قلب تملى سنين

بس لو حسيت بغدر

لون القلب يتحول لطين

فمتظنيش،،
 هفرش دموعي فى سكتك

احنا مبندمعش

جوانا عزة نفس  مع الوجع

مهما ذاد بينا الالم منتوجعش

فمتشديش،،
على القلب بشروطك

لسة متعرفيناش

ممكن نسامح عشان بنحب

بس لو هيكسرنا الغرام ندفنه

كانه مجاش

وانا ياما عشانك سامحت

وياما خطاوي اتعثرت عديتها
 وعملت نفسي مشفتهاش

انا حبي ليكي لو هيتمدد هيملى الكون

مفيش حكاوي توصفه

ولا فيش عيون

بس كله قصاد كرامتي يهون

فمتركبش العند وتسوقي

متضيعيش عشرة سنين

عشان وهم اتخلق لحظة جنون

لسة الغرام جوايا حنين دافي

لسة شفايفك طعم شهدي

ولساكي ....

لساكي اللي برتاح لما انطق اسمها

لساكي اللي ما يرحني غير حضنها

 لساكي اللي مش شايف بين البشر زيها

فسيبك من خطوط اليدين وكدبها  

خط قلبي ابدا  مش زيها

انا قلمي ممكن يجرحك

بس قلبي بيقول الفين سلامتك قبلها

تلات سنين

ولسة معرفتيش مكانتك عندي

وحجمها

!!!!!!!!!!!! 

................

بركات حمدي