فى الاول
لما كنت اكتب كلامى لعيونك
كان القلم من فرحته
فوق السطور يرمح
كان عارف طريقه
ولا مرة شخبط
عمره ماكان يمسح
وكأنك كنت بتمليه
وهوا كان يسمع
ودلوقتى ...عاد تايه
وسط الحروف بيتعنقل
والحبر جواه بقى ناشف
وكيف يكتب وعيونك مش فى ايامه
منين هيجيب كلام
وحبل وريده اتقطع
كيف يكتب والبعاد يدبح
وهو اللى اتعلم الكتابة عشان خاطرك
مش عشان ينجح
دا حبك كان هوا العلام
كان هوا شهادتى لما هتخرج
شفتى لما الم البعاد صابه
بقى تايه ملوش مطرح
بقى من الهموم سكران بيتطوح
لا قادر يخط ولا يرسم
ولا عارف من الدموع يفرح
ولو قال كلمة بعد عذاب
بتطلع كلمته تجرح
شفتى... حتى القلم رافض
لتوطينك فى الغياب
وازاى تهجرى ارضك
وتسيبى وطنك لاغراب
انا وطنك وانا حضنك وانا قلمك
لا بعرف استضيف غيرك
ولااتهجى ولا اكتب
غير حروف اسمك
وفى كل سنين تعليمى
ماتعلمت غير نطقك
اسمك دا كان اول اسم
اتعلمته فى كتاب القراءة
واول حرف خطيته
بطبشيرةعلى السبورة
وقلبك دا كان اول رسمة
انا ارسمها فى كتاب
مش قادر على الغياب
البعد خلانى اكلم نفسى
خلانى كرهت العد
وكرهت ارقام الحساب
......................
بركات
ليست هناك تعليقات:
إرسال تعليق