فى حضن الليل

.....................

في حض الليل اللي شهد ضحكي

بيشهد نزف اوجاعي

وكل مكان حكيناله وبوحناله بيجلدني

ويسمع قلبي مواله

انــــــــــــــا مشتاق 
لكن شوقي مليه الحزن من بابه

وشئ انكسر فيا ولا يمكنش اصلاحه

انا جوايا مداين من جروح

وبضحك في وش الناس..عادي 

عشان محدش يقول ماله

لكني متقسم 

ما بين حبك وبين بعدك
وبين النار اللي جوايا
 الناراللي ياما خفت هبتها

وجتني بعد ما نسيتها

 بعزم الريح... واحماله

وحبك فيا متمدد مع الشريان

 وانا تعبان من الفرقة

ومش قادر اخطي الالم واوصل

 مش قادراعدى جسر احزانه

عارفة الحنين جوايا شكله ازاي

نزيف مخلوط باوجاعي

ومفيش داعي لاي كلام

لان جرحي مش هيطيب مع الايام

لكنه هيبقى جوايا بيتجدد مع الحيرة

والفين سين ملاحقاني

انا ساكت لكني بالالم مدبوح

فيا اللي فيا وانتي عارفاني

مش بسهولة اني اتكسر

او استسلم لاحزاني

بس المرة دي ما قدرتش

موج الغدر كان عالى

وسفينة صبري

كسر قلعها الريح وسيباني  
انا الغرقان 

انا الغرقان
 اللي طوحه موج الالم على غفلة 

وفى وسط بحر الظلام

ملقيش لنور الامل قشة

تاخد بيد الحلم توصله لسكة

واهو تاه مع الايام

وضيعت خطوته القسمة

فى حضن الليل 

...............
بركات حمدي