اتهموني فيكِ

..................

اتهموني فيكِ وقالوا

انا اللي هتكت عرض الامنيات على خدودك

وانا الي اتحرشت بالحلم فى عيونك

وانا اللي نمت معاكِ بالعافية

وغميت فيكِ احساسك

وانتِ اللي كنتِ بالهوى كافرة

وقالوا اني مشاغب

نطيت سور الهوى

وسرقت من وردك وتفاحك

ودخلت غرفة نومك الوردي

وانك كنتِ نايمة ومش حاسة

وانك صحيتي من غفوتك فجاة

لاقتيني قدامك

 وماسك بالحنين وردة

اتهموني..... وقالوا

اني فارض نفسي على الاحلام

وانك بتقدمي قربك اتاوة

اتهموني بالارهاب على عيونك

واني احتليت شوارعك 

ومحاصر ميادينك

اتهموني وسبتيهم

وانتِ اللي عارفاني

ان اللي بينا قسمة حقاني

ميعرفوش ان الارض دي ارضي

وان الحضن دا حضني

وان انا اللي زرعت الورد

اللي طارح على خدودك

انا اللي رويت شفايفك من هوى  شوقي

قوليلهم مين اللي نامت ليالي 

ضحكانة على صدري

ومين اللي من فرط الغرام والشوق

 ياما قبلت خدي
قوليلهم ان انا قلبك
وانتِ روح قلبي 

......................

بركات حمدي