وقالتلى
قدامك سكة سفر
وطريق طويل مليان حفر
ولليل وبرق ومطر
قدامك سكة وجع
وقلب من الهم اتكسر
قدامك عيون غربها الحنين
دايرة تدور غلى الاتر
مالك ياولدى
العشق ليه خلاك طرى
ماالقلب كان زى الحجر
والليل يخاف من طلتك
ومن عزم صوتك
كان بيتهز الشجر
ليه اتانيت على صدر الحنان
ورميت مراكبك للخطر
روحت ليه ويا العيون
سكنت نفسك على القمر
مين اللى قالك على الغرام
مين اللى دلك على السهر
مين اللى قالك
ان الحب طعمه سكر
داهى بس اول بلعة ميا حلوة
والباقى مية بحر
قلتلها ياخالة
بالراحة على الوجع
وسيبك من كل
اللى بيقوله الودع
سيبك من الرمل وكلامه
واقرى من قلبى اللى طالع
بصى فى عيونها وقوليلى
لاحسن تكون عملالى سحر
ممكن تكون كتبالى اسمى بالمحبة
على ضهر سمكة فى قعر بحر
بس ازاى يا خالة يكون دا سحر
وهيا ساكنة جوايا روح
وهيا بتجرى فيا نهر
وهى بين ضلوعى اذان وطهر
وهى فى مساجدى صلاة
من مغرب لعصر
ويوم ماغابت عن دروبى
شرخت لى عمر
ومترفعش اذان جوايا
ولا اتصلى فى جوامعى فرض
ياخالة دا عشق
و من ميتى العشق كان له كبير
دا ياما كسر قلوب ..ياما توه بشر
مبنقدرش نقوله لا
طب ازاى هنقوله لا
هوا احنا نقدر نغير قدر!!!
لمى ياخالة الودع
مش هينفعنى كلامك
حتى لو صدق
.............
بركات حمدى
ليست هناك تعليقات:
إرسال تعليق