.................
طعم الملح
وطعم الشوك
في الحلق متمدد
والقلب في النفس الاخير
بيتشهد
خلص الكلام والقول
والحرف لبس اسود
معدش ينفع بكى
حرام على الميت
.......................
بركات حمدي
الأربعاء، 2 نوفمبر 2011
مشبك خشب
*********
مشبك خشب
علقت فيه حلمي
مقدرش يستحمل رياح الخوف
مقدرش يمسك ضحكتي
لما الزمن عاند
مقدرش يتحمل ظروف
وادي التمن
صبح الالم جوايا
طريق مرصوف
والاماني اداس عليها
وسط زحمة خوف
مشبك خشب
ضيع سنين وسنين
انا اللي غلطان يا زمن
ولا الغلط على مين
علقت عمري
في ضحكة سكنتني
واما فارقتني
نهش قلبي الانين
وسابني بترجى الالم
واقوله يا الم ما تلين
مشبك خشب
عيشني فى سما الوان
واما الزمن خاني
سابني انام في الطين
.................
بركات حمدي
الخطوة بعدت
الخطوة بعدت
واترسم في السكة
مشوار الفراق
والليل ملانا هموم
وبدل لاشتياق
اللي اتكسر جوانا عمر
والوقت اللي ياما اتسع لينا
دلوقت داق
مش لاقي منك
غير شوية ذكريات
هما اللي فضلو
من سنين عشاق
وكل الكلام اللي اتكتب
راح في موجة دمع
وداب مع الاوراق
ايه الي غرب شمسنا
في عز النهار
مش كنا متعاهدين
ندادي الامل
ونكبر الاشواق
ليه العهود اتبدلت
وسكن الالم احداق
ليه يا فراق
شدتني فى احضان دنيتك
ليه اتنفى فيا الغرام
وبقيت فى لليلي غريب
انا اللي ياما
ضحكتي سمعت نيام
انا اللي ياما
خدت منك اجمل الاحلام
ورسمت بشموعك
مداين من غرام
اديني ساكت
والالم جوا الضلوع موال
اديني وحدي في ضلمتك
بترحم على الايام
.................
بركات حمدي
الاشتراك في:
الرسائل (Atom)